اورجانيك نيشن

إذا كانت علاقتك بالطعام واحدة مما يلي ، فاعلم أن علاقتك بالطعام في خطر 👀

1. إنك بتخافي من الأكل بشكل عام و بتقللي الكميات عشان ماتتخنيش.
2. أو مابتعرفيش تسيطري على نفسك و بتفتحي فى الأكل بكميات كبيرة فبتكون النتيجة كارثية.

فى الحالتين هتلاقي كل مشاكلك سببها علاقتك بأكلك عاملة إزاى لأن نتيجتها بتأثر على صحتك العامة و بالتالي على حياتك كلها.

• طيب الحل إيه عشان نخرج برة دايرة الخطر أو إن علاقتك بالأكل تسببلك مشاكل ؟ الحل إنك تعرفي إزاي تاكلي صح قبل ماتبدأي تحتاري إزاي تختاري نظام دايت مناسب ليكي وتجربي نظام والتاني و ماتلاقيش نتايج فتُحبَطي وماتكمليش أو تمشي على نظام بيأثر على صحتك بالسلب وانتي مش عارفة

•عشان تعرفى إزاى تاكلي صح الموضوع مش معقد زى مانتي فاكرة الموضوع عايز تعود و شوية إلتزام عودي نفسك تاخدي 3 وجبات على مدار اليوم (فطار – غدا – عشا) و في النص مابينهم ممكن تاخدي عصير فريش أو فاكهة أو أى سناك خفيف, ولازم كل وجبة تكون متوازنة يكون فيها مصدر بروتين, مصدر للنشويات, مصدر للدهون الصحية, و خضار أو سلطة, سواء كان هدفك إنك تنزلي بالوزن والدهون أو لو انتى بتعاني من النحافة و عايزة تزيدي فى الحالتين بتاكلى بنفس الطريقة و نفس أصناف الأكل مع فرق الكميات فى كل وجبة.

• بمعنى إنك لازم تدي جسمك كفايته من العناصر الغذائية كلها لكن من مصادر أكل نظيفة مفيش فيها وجبات سريعة مليانة دهون و لحوم مصنعة أو مشروبات غازية مليانة سكر أو حتى مشروبات طبيعية مليانة سكر أبيض و حلويات و معجنات.

• ومفيش حاجة إسمها أنا هاكل كل حاجة و أى حاجة بس كميات قليلة و بكدة مش هابوظ دايت, ولا أصل أنا كدة كدة عايزة أزيد فهاكل أى حاجة براحتي طالما عايز أزيد.

• نضفي أكلك و نظمى وجباتك حسب الهدف اللى عايزة توصلي ليه ومش لازم تحرمي نفسك تقدري تاكلي حلويات بس مش كل يوم والأفضل لو معمولة بطريقة صحية متحلية بعسل طبيعي بدل السكر شوكولاتة غامقة بدل صوصات الشوكولاتة الجاهزة, تقدري تاكلي بيتزا أو برجر من وقت للتانى برضه مش بكميات كبيرة وتكون معملوة بمكونات صحية من غير لحوم مصنعة أو دهون مهدرجة و هكذا.

• لو طبقتي شوية النصايح البسيطة دي هتلاقي نفسك علاقتك بالأكل عادية خالص مش مسببالك أى قلق ولا خوف ولا إحساس بالذنب غير إن صحتك هتتحسن بشكل ملحوظ و مودك كمان هيكون ألطف بكتير وهيبان بشكل ملحوظ على شكلك و بشرتك و شعرك.